Праграмны накірунак “Павышэнне прафесійных кампетэнцый” мае на мэце ўдасканаленне кваліфікацыі спецыялістаў па асноўных тэматычных накірунках дзейнасці арганізацыі (гісторыя, права, правы чалавека, устойлівае развіццё, метады выкладання і трэнерскае майстэрства, мэнэджмэнт некамерцыйных арганізацый). Праграмы павышэння прафесійных кампетэнцый праводзяць дасведчаныя спецыялісты арганізацыі і запрошаныя эксперты, якія маюць навуковыя і акадэмічныя ступені, досвед працы ў вышэйшых навучальных установах, міжнародных праектах і арганізацыях. Грамадскім аб’яднаннем “ВІТ” падрыхтаваны метадычныя і навучальныя матэрыялы па асноўных тэматычных накірунках дзейнасці арганізацыі.

Праграмны накірунак “Грамадзянская адукацыя” скіраваны на фармаванне грамадзянскіх кампетэнцый удзельнікаў праграм дадатковай адукацыі моладзі і дарослых праз іх азнаямленне з падставовымі канцэпцыямі ўстойлівага развіцця, дэмакратыі, права і правоў чалавека, магчымасцямі іх практычнага выкарыстання ў паўсядзённым жыцці;гісторыяй роднага краю, важнасцю аховы і папулярызацыі гісторыка-культурнай і прыроднай спадчыны;магчымымі шляхамі актыўнага ўдзелу ў выяўленні і вырашэнні мясцовых праблем.Доўгатэрміновая мэта праграмнага накірунку “Грамадзянская адукацыя” палягае на выхаванні новай генерацыі кампетэнтных беларускіх грамадзян, якія бяруць актыўны ўдзел у жыцці сваіх супольнасцяў.

Праграмны накірунак “Мясцовае і рэгіянальнае і развіццё” скіраваны на распрацоўку і рэалізацыю прапаноў, стратэгій і пілотных інавацыйных праектаў у такіх сферах, як устойлівае развіццё, захаванне гісторыка-культурнай і прыроднай спадчыны, выкарыстанне турыстычнага патэнцыялу г. Гродна і вобласці.Гісторыя гэтага праграмнага накірунку пачынаецца ад стварэння пры Грамадскім аб’яднанні “ВІТ” Грамадскага клуба “Стары горад”, у межах дзейнасці якога былі вывучаны патрэбы развіцця цэнтральнай часткі г.Гродна, распрацаваны адпаведныя прапановы і праекты, якія пазней былі перададзены мясцовым органам улады. Частка з гэтых прапаноў была рэалізавана, некаторыя застаюцца актуальнымі па сённяшні дзень.