Першая вочная сесія Школы краязнаўцаў

 

28 жніўня на офісе ГА ВІТ прайшла першая вочная сесія Школы краязнаўцаў. Удзельнікаў школы сабралася каля дзесяці чалавек. Яшчэ столькі ж будуць працаваць дыстанцыйна. Падчас першай сесіі навучэнцы школы даведаліся пра розніцу паміж мікрагісторыяй і краязнаўствам, паспрабавалі чытаць старабеларускія і старапольскія дакументы а таксама пазнаёміліся з рэсурсамі па гісторыі Гродзеншчыны ў сеціве і навучыліся рабіць гугл карты !

Праводзілі паседжанні сесіі сябры ВІТа Андрэй Вашкевіч і Наталля Сліж. Выступіў запрошаны эксперт – доктар гістарычных навук Сяргей Токць.

 На працягу Курса ўдзельнікі пазнаёмяцца з інавацыйнымі метадамі працы з мясцовай гісторыка-культурнай і прыроднай спадчынай (мікрагісторыя, рэгіяналістыка, вусная гісторыя і інш.), атрымаюць практычныя веды адносна найбольш эфектыўных спосабаў працы з комплексам крыніц і навуковай літаратуры па гісторыі і культуры населеных пунктаў і супольнасцяў Гродзенскай вобласці; Набудуць і/ці ўдасканаляць індывідуальныя кампетэнцыі ў планаванні і правядзенні краязнаўчых даследаванняў і мерапрыемстваў па папулярызацыі мясцовай прыроды, гісторыі і культуры; будуць атрымліваць кансультацыі з боку спецыялістаў па пытаннях гісторыка-культурнай і прыроднай спадчыны, а таксама зваротную сувязь з боку іншых удзельнікаў курса па розных аспектах тэматыкі курса і рэалізацыі ўласных ініцыятыў у сферы даследавання і папулярызацыі мясцовай прыроды, гісторыі і культуры.  Адукацыйны курс праводзіцца ў межах Праекта «Пашырэнне доступу да дадатковай адукацыі дарослых праз распрацоўку і ўкараненне эксперыментальных вочна-дыстанцыйных курсаў Гродзенскага абласнога грамадскага аб'яднання маладых навукоўцаў «ВІТ», які рэалізуецца пры падтрымцы Фонду “Еўразія” за кошт сродкаў Агенцтва ЗША па міжнародным развіцці. Праект зарэгістраваны ў Дэпартаменце па гуманітарнай дзейнасці Упраўлення справамі Прэзідэнта Рэспублікі Беларусь (Пасведчанне № 03-10/5 ад 11.05.2016)