ВІТу 21 год! Віншуем усіх сяброў арганізацыі!

Грамадскае аб’яднанне “ВІТ” паўстала ў 1995 годзе па ініцыятыве аспірантаў і маладых выкладчыкаў Гродзенскага дзяржаўнага універсітэта імя Я. Купалы, якія вылучаліся актыўнай грамадзянскай пазіцыяй і ўдзельнічалі ў грамадскім і нацыянальна-адраджэнскім руху другой паловы 1980-х – пачатку 1990-х гадоў. З таго часу заснавальнікі “ВІТа” істотна “падраслі”, але працягваюць прымаць актыўны ўдзел у працы арганізацыі. Грамадскае аб’яднанне пастаянна папаўняецца маладымі сябрамі – пераважна навукоўцамі-гуманітарыямі.

Сябры арганізацыі ў сваёй працы сыходзяць з прынцыпа, што нацыянальная свядомасць і гістарычная памяць граюць у грамадстве ролю базіса сацыяльнай актыўнасці, надаюць сэнс сацыяльнай дзейнасці грамадзяніна. Толькі той грамадзянін дзяржавы, які памятае свае карані і ведае гісторыю краіны і народа, можа ўсведамляць сэнс сваёй сацыяльнай актыўнасці і скіроўваць яе ў рэчышча, карыснае для інтарэсаў супольнасці.