Грамадскае аб'яднанне "ВІТ" даслала прапанову мясцовым уладам пра ўсталяванне інфармацыйных шыльдаў

Грамадскае аб'яднанне "ВІТ" даслала прапанову мясцовым уладам пра ўсталяванне інфармацыйных шыльдаў пра адметныя будынкі і вуліцы ў гістарычным цэнтры горада Гродна. У лісце прапануецца усталяваць у горадзе тры катэгорыі шыльдаў:

Першая катэгорыя – шыльды каля гістарычных помнікаў. На іх будуць змешчаны звесткі пра даты пабудовы, архітэктурны стыль, заснавальнікаў, архітэктараў, асноўныя падзеі ў гісторыі будынка ад заснавання да сённяшняга дня, а таксама цікавыя выявы помніка, якія паходзяць з мінулага. Такія шыльды прапануецца змясціць ля Каложскай царквы, Ніжняй царквы (на тэрыторыі Старога замка), Старога замку і шэрагу іншых помнікаў.

Другая катэгорыя – шыльды, прысвечаныя гісторыі вуліц ці плошчаў. Гэтыя шыльды прапануецца ўсталяваць на пачатку вуліц/на плошчах.

Трэцяя катэгорыя – шыльды з выявамі прац знакамітага мастака Напалеона Орды. Іх прапануецца ўсталяваць у тых месцах, адкуль мастак маляваў Гродна ў 1860-х гг.

Прапанаваны падыход да развіцця інфармцыйна-турыстычнага патэнцыяла Гродна базуецца на досведзе замежных краін, у тым ліку Польшчы (Кракаў, Люблін, Варшава), Украіны (Львоў) і Літвы (Вільнюс).

Размяшчэнне ў гістарычным цэнтры горада разнастайных шыльдаў з цікавай гістарычнай інфармацыяй дапаможа турыстам адчуць атмасферу мінулага горада, даведацца больш пра яго гісторыю, адшукаць дарогу да важных культурных аб’ектаў, заахвоціць да больш грунтоўнага азнаямлення з горадам.Усё гэта зробіць побыт турыста ў Гродна больш камфортным і заахвоціць наведаць наш горад яшчэ не адзін раз.

Арганізацыя прапануе сваю дапамогу ў распрацоўцы і рэалізацыі прапанаванай канцэпцыі ўсталявання шыльдаў і гатовая разам з гарадскімі ўладамі шукаць грошы на развіццё інфармацыйна-турыстычнай інфраструктуры Гродна.

Аўтарамі прапаноў з'яўляюцца сябры арганізацыі гісторыкі Андрэй Вашкевіч і Наталля Сліж.

Чытаць больш:

https://harodnia.com/be/poszuki/idei-dlia-horada/80-prapanova-maladyh-navukoucau

https://harodnia.com/be/poszuki/idei-dlia-horada/79-prailustravac-malunkami-ordy